10-dan çox şəxsin dələduzluq yolu ilə pulunu ələ keçirən 1996-cı il təvəllüdlü Məmmədov Ayxana hökm oxunub. Bu barədə oktyabrın 19-da Qafqazinfo xəbər yayıb.
O, 7 il müddətinə azadlıqdan məhrum edilib.
Ayxanın dələduzluq yolu ilə ələ keçirdiyi ümumi məbləğ yarım milyon manata yaxın olub. O, birinə sosial ev almaq, digərinə iş düzəltmək, başqa birinin xəstəsini müalicə etdirmək adı ilə külli miqdarda pullar mənimsəyib.
Ayxan məhkəmədə “Xəzər TV”də çalışdığını, dələduzluqlarından bir neçəsini də tanınmış aparıcı Xoşqədəm Hidayətqızının adından istifadə etdiyini bildirib. Belə ki, Ayxan bir neçə zərərçəkənə özünü X.Hidayətqızının gah mühafizəçisi, gah da köməkçisi kimi təqdim edib.
Ayxan bu əməlini məhz qonşularına qarşı törədib. Belə ki, Ayxan qonşularına Xoşqədəm Hidayətqızına pul lazım olduğunu və bir neçə gündən sonra artıqlaması ilə qaytaracağını vəd edib.
Qonşuları Ayxandan pulu geri tələb edən zaman isə o, Xoşqədəm Hidayətqızının adından mesaj yazaraq onları arxayın salıb. Vədlərə bir müddət səbir edən zərərçəkənlər sonda hüquq-mühafizə orqanlarına müraciət ediblər.
Məhkəmə zamanı müəyyənləşib ki, Ayxan Məmmədova məxsus bank kartına iki il müddətinə 485 206 manat məbləğində depozit edilib.
Təqsirləndirilən şəxs, həmçinin zərərçəkənlərə qardaşının DTX-da, anasının müəllim, atasının bələdiyyə sədri işlədiyini bildirib.
