Zaqatalada itkin düşən Hindistan vətəndaşı Manikanth Kondaveetinin tapılması üçün təyin olunan mükafat 10 000 manatdan 25 000 manata artırılıb. Bu barədə itkin düşən şəxsin ailəsinə istinadən APA məlumat verib.
Məlumatda deyilir ki, bu mükafat yekun məbləğdir və onu tapan şəxslər arasında bərabər qaydada bölünəcək.
M.Kondaveetinin qardaşının sözlərinə əsasən, pul mükafatı ancaq itkin düşən şəxs sağ-salamat tapıldığı halda veriləcək. Onun harada olması barədə hər hansı məlumat verən şəxs isə ədalətli şəkildə mükafatlandırılacaq.
“Yalan məlumat verən şəxslər haqqında hüquqi prosedur tətbiq ediləcək”, - deyə o qeyd edib.
29 yaşlı Hindistanlı turistin itkin düşməsi ilə bağlı polisə müraciət mayın 17-də daxil olub. Araşdırma zamanı məlum olub ki, o, mayın 12-də Zaqatalada qaldığı hoteli tərk edib və Car kəndinin çətin relyefli yüksək dağlıq ərazisinə gedib.
