Sosial şəbəkələrdə Rəmziyyə Cəfərova adlı qadının aparıcı Zaur Baxşəliyevi övladlarının müalicəsi üçün toplanan vəsaiti mənimsəməkdə ittiham etdiyi video yayılıb. Bu haqda iyulun 4-də 1News.az məlumat paylaşıb.
Videoda hərbçi xanımı olan Rəmziyyə Cəfərova 4 övladı olduğunu, 2 uşağının isə ürək qüsurlu doğulduğunu bildirib. Ona uşaqlarının əməliyyatı üçün 75 min manat pul lazım olub. Bununla əlaqədar o, dəstək üçün Zaur Baxşəliyevə müraciət edib. Qadının sözlərinə görə, aparıcı bu məbləğin əvəzinə efirdə 150 min manatın adını çəkmək şərti ilə kömək etməyə razılaşıb.
Rəmziyyə Cəfərova bu şərtlərlə razılaşmadığını, sonra isə tanışlarının köməkliyi ilə “Bizimləsən” verilişinin efirinə getdiyini söyləyib: “Köməyə ehtiyacı olan 5 ailə idik. Razılaşdıq ki, tələb olunan məbləği bir karta yığaq”.
Daha sonra qadın karta 180 min manatın yığıldığını, lakin ona kömək üçün heç bir vəsait ayrılmadığını iddia edib.
