AZAL-ın Pilotların Hazırlığı Mərkəzində “Embraer E-90” tipli təyyarələrində uçuşların simulyasiyası üçün yeni təlim trenajoru quraşdırılıb. Bu barədə sentyabrın 22-də AZAL məlumat yayıb.
Məlumata görə, yeni trenajor kompleksi pilotlara xaricə getmədən Azərbaycanda hazırlıq keçmələrinə şərait yaradacaq. Milli Aviasiya Akademiyasında trenajor kompleksinin quraşdırılması üçün yeni bina inşa edilib.
Trenajor vasitəsilə uçuş zamanı təyyarənin kabinəsi, uçuş dinamikası və ətrafın görünmə dərəcəsi real həyatda olduğu kimi əks olunur. Trenajor kompleksində Azərbaycan pilotları ilə yanaşı xarici aviaşirkətlərin pilotları da təlim keçəcəklər.
AZAL-ın Pilotların Hazırlıq Mərkəzi 2010-cu ildən fəaliyyət göstərir. Hazırda Mərkəzdə Airbus A319/320, Boeing 757/767, ATR-42/72, eləcə də Mi-8AMT helikopteri üçün uçuş trenajorları fəaliyyət göstərir.
