Bakıda şöbədə həyat yoldaşını öldürməkdə təqsirləndirilən sabiq polis əməkdaşının cinayət işi üzrə məhkəməsi başlayır. Bu barədə dekabrın 29-da Report məlumat verib.
Bildirilib ki, cari ilin sentyabrın 30-da Nizami rayonundakı polis şöbəsində Xanım Məmmədovanın qəsdən öldürülməsi faktı ilə bağlı ibtidai istintaq tamamlanıb.
Qeyd edilən tarixdə polis əməkdaşı xidmətdə olarkən həyat yoldaşı onun tərəfindən döyülməsi ilə əlaqədar şöbədə izahat verib. Bu vaxt şöbəyə gələn İsmayıl Məmmədov azyaşlı övladlarının gözü qarşısında üzərində gəzdirdiyi xidməti silahla 15 dəfə atəş açaraq həyat yoldaşını öldürüb.
İsmayıl Məmmədova “zərərçəkmiş şəxsin xidməti vəzifəsini və ya ictimai borcunu yerinə yetirməsi ilə əlaqədar onun özünü və ya yaxın qohumlarını öldürmə”, “xüsusi amansızlıqla və ya ümumi təhlükəli üsulla adam öldürmə” və “qəsdən sağlamlığa yüngül zərər vurma” maddələri ilə ittiham elan edilib.
Hazırda cinayət işi baxılması üçün Bakı Ağır Cinayətlər Məhkəməsinə göndərilib.
