22 sentyabr tarixindən məktəblərdə ənənəvi formada yeni tədris ilinə başlanılacaq. Valideynlərin sözlərinə görə, bu qərardan sonra mağazalar məktəb ləvazimatlarının qiymətini bahalaşdırıblar. Bu haqda 21 sentyabr tarixində Sputnik Azərbaycan "Sədərək" ticarət mərkəzində araşdırma edib.
Bu il iki övladını məktəbə yola salacaq Venera Məmmədova adlı valideyn məktəb ləvazimatlarının qiymətində artım olduğunu deyib: "İki həftə əvvəl çantaların, dəftər-qələmin qiyməti çox ucuz idi. Həmin vaxt almadım ki, məktəblərin açılıb-açılmayacağı məlum deyil. 1-ci sinfə gedəcək uşaqlar üçün çantaların qiyməti 15-20 manat arasında idi, indi isə ən ucuzu 25 manatdır. Dəftərlərin qiymətində də 5-10 qəpik bahalaşma var".
"Sədərək"-də işləyən satıcı Valeh Eyvazov isə bu fikirlə razı deyil. Onun sözlərinə görə, ucuz çantalar satılıb qurtarıb, qalan çantaların qiyməti isə 25-40 manat arasındadır.
Məktəb ləvazimatlarının qiymətləri əsasən məhsulun istehsal olunduğu ölkədən asılı olaraq dəyişir. Ən bahalı məktəb ləvazimatları Rusiya, ən ucuz isə Çin istehsalı olanlardır. Nisbətən orta qiymətlərlərlə Türkiyə məhsulları satılır.
Ticarət mərkəzində məktəblilər üçün ağ köynəklərin qiyməti 15-28 manat arasında dəyişir, şalvarların qiymətləri isə 17-23 manat civarındadır. Ayaqqabıların ən ucuzunun qiyməti 18 manatdır, amma valideynlər şagird üçün normal keyfiyyətdə ayaqqabıların 30 manatdan ucuz olmadığını söyləyiblər.
Ötən illərlə müqayisədə, məktəb formalarının qiymətində isə heç bir dəyişiklik müşahidə olunmayıb. Belə ki, I-VI siniflər üçün kostyumun qiyməti 40 manat, VII-XI siniflər üçün isə 46 manat təşkil edir.
Satıcıların sözlərinə görə, bir şagird üçün məktəb ləvazimatlarının alınması minimum 90 manat xərc tələb edir.
Araşdırma nəticəsində məlum oldu ki, bir şagird üçün məktəb xərci ən azı 250 manat vəsait tələb edir.
