Bu ilin yanvar-iyun ayları ərzində 821 nəfər məişət zorakılığına məruz qalıb. Əvvəlki ilin müvafiq dövründə bu cür cinayətlərin qurbanların sayı 663 nəfər təşkil edib. Bu barədə Dövlət Statistika Komitəsindən avqustun 17-də məlumat verilib.
İyun ayına qədər qeydə alınmış 14928 cinayətlərin 803-ü məişət zorakılığı ilə bağlı olub. Bu əvvəlki illə müqayisədə 24,3 faiz çoxdur.
Məişət zorakılığının qurbanlarından biri öz hekayəsini danışıb. Bu barədə BBC Azərbaycanca məqalə paylaşıb.
Qadın Sığınacağında yaşayan Firuzənin (ad şərtidir) 46 yaşı var. O, 29 illik evlilik həyatı ərzində həyat yoldaşı tərəfindən mütəmadi şəkildə döyülürdü. Qadın ərinin onu döymə tərzini "vəhşilik" adlandırır.
Firuzə ölkənin şimal rayonlarından birində doğulub və yetkinlik yaşına çatmamış ailəsi tərəfindən ərə verilib. Onun sözlərinə görə, yaşadığı rayonda qızların oxudulması deyil, ərə getmələri daha vacibdir.
“Dəfələrlə ayrılmaq istəmişəm, lakin ailəm imkan verməyib. Gedəsi yerim yox idi deyə dözürdüm. Ən çox qızıma nəsə edər deyə qorxurdum”, - deyən Firuzə ağlayaraq qızının təhsil almasını arzuladığını bildirir.
Azərbaycanda 2010-cu ildən "Məişət zorakılığının qarşısının alınması haqqında" qanun tətbiq edilir. Qanuna əsasən, zərərçəkmiş şəxsə mühafizə orderi verilə bilər. Order məişət zorakılığını törətmiş şəxsə zərərçekənə qarşı narahatlıq gətirən hərəkətlərin edilməsini qadağan edir.
Vətəndaşlar qadına qarşı zorakılıq halları ilə üzləşdikdə Baş Prokurorluğun “961” Çağrı Mərkəzinə müraciət edə bilərlər.
