Bugün, dekabrın 1-də Laçın rayonunun erməni işğalından azad edilməsindən bir il ötür.
Ötən ilin noyabrın 10-da Azərbaycan Prezidenti, Ermənistan Baş naziri və Rusiya Prezidentinin imzaladığı üçtərəfli Bəyanata əsasən, Laçın Azərbaycana təhvil verilib. Ağdam, Kəlbəcər və Laçın rayonları siyasi yolla, heç bir itki vermədən geri qaytarılıb.
Laçın rayonu 1992-ci ilin may ayının 18-də Ermənistan Silahlı Qüvvələri tərəfindən işğal edilmişdir. Birinci Qarabağ müharibəsində 264 laçınlı şəhid olmuşdur, 65 nəfər isə girov götürülmüşdür. Rayonun 6 Milli Qəhrəmanı vardır. 28 il ərzində şəhər və rayonun yaşayış məntəqələri, tarixi, mədəni, dini abidələr və qəbiristanlıqlar dağıdılmışdır.
Hazırda Laçında bərpa-yenidənqurma işləri aparılır, yeni infrastruktur yaradılır. Avqust ayında Kəlbəcər-Laçın avtomobil yolu üzərində inşa olunacaq tunelin və Laçın Beynəlxalq Hava Limanının təməlləri qoyulub.
