Bugün sentyabrın 1-dən payızlıq əkinlərin bəyanı başlayır. Bəyanların qəbulu dekabrın 30-na kimi davam edəcək. Bu barədə 1 sentyabr tarixində Kənd Təsərrüfatı Nazirliyinin rəsmi səhifəsində məlumat yayılıb.
Fermerlər eagro.az saytı vasitəsi ilə onlayn şəkildə və ya Dövlət Aqrar İnkişaf Mərkəzlərinə, Regional ASAN xidmət mərkəzlərinə, Xaçmaz və Yevlax KOB evlərinə müracət edib payızlıq əkinləri bəyan edə bilərlər.
Fermer əkini bəyan etmək üçün Elektron Kənd Təsərrüfatı İnformasiya Sistemində elektron kabineti aktivləşdirməli, əkilən və ya mövcud bitkini doğru seçməli, bəyan hektarının konturlarını və əkin yerini elektron xəritədə düzgün qeyd etməlidir.
Elektron kabinet ildə bir dəfə yenilənir. Fermerin əkin sahəsinin həcmi 5 hektardan çoxdursa, o, torpağının aqrokimyəvi analizini də aparmalıdır. Əgər bunu ötən il edibsə, bu il analizin aparılmasına ehtiyac yoxdur.
Vaxtında edilməyən və ya yanlış edilən bəyan nəticəsində fermerlərə əkin subsidiyası ödənilməyəcək. Yanlış bəyan fermer üçün subsidiyanın az ödənilməsi, yaxud 1 və ya 2 il ödənilməməsi halı ilə nəticələnə bilər. Ödəniş aparıldıqdan sonra yanlış bəyan müəyyən edilərsə cərimə tətbiq olunacaq.
Bu bəyanlar 2022-ci il üzrə əkin subsidiyasının alınması üçündür.
