Bakı Ağır Cinayətlər Məhkəməsində rüşvət almaqda təqsirləndirilən mədəniyyət nazirinin sabiq müavini Rafiq Bayramov avqustun 17-də 8 il müddətinə azadlıqdan məhrum edilib.
Məhkəmədə ittiham olunan şəxs son sözündə özünü təqsirli bilmədiyini deyib: "Mənim imza səlahiyyətim olmayıb, maddi-məsuliyyətli şəxs olmamışam. Nazirliyin bütün maliyyə hesabatları yoxlanılıb, problem olmayıb. Mənə verilən ittihamlar sonradan dəyişdirildi, rüşvət ittihamı verdilər. Mən heç kəsdən rüşvət almamışam".
DTX tərəfindən aparılan cinayət işi üzrə Rafiq Bayramov vəzifə səlahiyyətlərindən sui-istifadə etmə, mənimsəmə və vəzifə saxtakarlığı faktlarına görə təqsirləndirilən şəxs qismində məsuliyyətə cəlb edilib.
Araşdırmalar nəticəsində Rafiq Bayramovun rayonlarda musiqi məktəblərində müəllimlərin adına artıq tədris saatlarının rəsmiləşdirilməsinə və bunun müqabilində onların əmək haqlarından tutulan vəsaitləri ələ keçirməsinə dair şübhələr müəyyən edilib.
Həmçinin ölkədəki musiqi məktəblərinin, muzeylərin və digər mədəniyyət müəssisələrinin təmir işlərinə görə ayrılan dövlət vəsaitlərinin bir hissəsinin Rafiq Bayramov tərəfindən mənimsəməsi müəyyən edilib.
