20 avqust tarixindən “IM-EX Trading” şirkəti Şəmkir pomidorunu Qətərə ixrac etməyə başlayıb. Bu barədə Oxu.Az saytında məlumat verilib.
“Dünən göndərdiyimiz pomidorla yüklənmiş ilk TIR-ımız Qətərə çatdı. Azərbaycan ilə Qətər arasında böyük həcmdə məhsul dövriyyəsi gözləyirik”, - şirkətin rəhbəri Turan Özbahçeci bildirib.
“Hazırda ölkədə 20-ə yaxın əməkdaşımız kənd təsərrüfatı sahəsində çalışan fermerlər və istehsalçılarla görüşür. Pomidor bizim ilk ixrac etdiyimiz məhsuldur. Yaxın zamanda meyvə-tərəvəz olmaqla, bütün məhsulların Qətərə ixracını həyata keçirəcəyik”, - deyə “IM-EX Trading”-in rəhbəri əlavə edib.
Turan Özbahçecinin sözlərinə görə, şirkətin Azərbaycanda istehsal edilən ətin ixracı ilə bağlı da layihəsi var.
2021-ci ildə kənd təsərrüfatı məhsulları arasında ixracda ən böyük pay pomidora məxsusdur. İlk 7 ay ərzində Azərbaycan 128 milyon dollarlıq pomidor ixrac edib. Ölkədə pomidor istehsalı ilə məşğul olan əsas rayonların sırasına Şəmkir, Abşeron və Xaçmaz daxildir.
