Salyan rayonundakı üzüm bağlarında yığım prosesi yekunlaşır. Bu haqda 14 sentyabrda AZƏRTAC məlumat verib.
Bu il üzüm bağlarında məhsul bol olsa da, fermerlər satış qiymətinin aşağı olduğunu söyləyirlər.
“20 hektar sahədən 50 tona yaxın üzüm yığmışıq. Ancaq qiymət ucuzdur. Builki məhsulumuzu emal müəssisələrinə 25 qəpiyə təhvil veririk. Bu isə bizi qane etmir”, - deyə bağ sahibi Əliağa Əliyev deyib.
Salyan Dövlət Aqrar İnkişaf Mərkəzinin böyük məsləhətçisi Şəhriyar İsgəndərov bildirib ki, rayonda 1122 hektar sahədə üzüm bağlarından 932 hektarı bar verəndir. Rayonda ən çox “Ağ ağadayı”, “Ağ şanı”, “Qara şanı” üzüm sortları əkilir. Ümumilikdə bağlardan 430 ton məhsul yığılıb.
Azərbaycanda 2021-ci ilin yanvar-iyul aylarında 7,7 min ton üzüm yığılıb. Ölkəmizdə üzüm istehsalı üzrə seçilən rayonlar sırasına Şəmkir, Cəlilabad, Tovuz, Şamaxı və Samux daxildir.
