Tehranda və İranın bir sıra şəhərlərində partlayış səsləri eşidilib. Paytaxtda azı üç partlayışın baş verdiyi, Qum, İsfahan və Buşehrə də zərbələrin endirildiyi bildirilir. Qum şəhərində nüvə obyektinin hədəf alındığı iddia olunur.
İnsanoid.com xəbər verir ki, İsrail ölkədə fövqəladə vəziyyət elan edib, hava məkanını bağlayıb və həyati əhəmiyyətli sahələr istisna olmaqla təhsil, toplantı və iş fəaliyyətini dayandırıb. Rəsmi şəxslər əməliyyatın aylarla planlaşdırıldığını açıqlayıb. Məlumata görə, İran rejiminə məxsus onlarla hədəf vurulub.
ABŞ-nin da zərbələrdə iştirak etdiyi, hücumların həm havadan, həm də dənizdən həyata keçirildiyi bildirilir. ABŞ Prezidenti Donald Tramp İranda genişmiqyaslı hərbi əməliyyat başladığını bəyan edib, İranı nüvə silahına sahib olmağa qoymayacaqlarını və hərbi hədəflərin məhv ediləcəyini bildirib. Tramp ABŞ-nin bombardmanları başa çatdıqdan sonra İran sakinlərini hökuməti devirməyə çağırıb.
İran hava məkanını tam bağlayıb. Məlumata görə, İranın Ali Rəhbəri Ayətullah Seyyid Əli Xamenei Tehrandan uzaqlaşdırılıb və daha təhlükəsiz yerə köçürülüb. Bəzi yüksək rütbəli hərbçilərin öldürüldüyü iddia edilsə də, bu məlumat hələ rəsmi təsdiqini tapmayıb. İran Prezidenti Məsud Pezeşkianın ölümü ilə bağlı iddialar təkzib olunub.
Azərbaycan Xarici İşlər Nazirliyi İranda təhlükəsizlik vəziyyətinin gərginləşdiyini nəzərə alaraq vətəndaşlara İrana və İsrailə səfərdən çəkinməyə çağırır.
