Ölkəmizdə "Son zəng"ə sayılı günlər qalıb. "Son zəng" məktəblilərin həyatında ən yaddaqalan günlərdən biri hesab olunur.
Məzunlar bu gün münasibətilə xüsusi geyimlər alır, foto və video çəkilişlər etdirir, müxtəlif tədbirlərdə iştirak edir və dostları ilə birlikdə məzuniyyətlərini qeyd edirlər. Buna görə də ailələr müəyyən məbləğdə xərc çəkməli olurlar.
Milli.az-ın araşdırmasına görə, bu il Azərbaycanda bir şagird üçün "Son zəng" xərcləri orta hesabla 500-1000 manat arasında dəyişə bilər. Xərcin məbləği əsasən məktəbin yerləşdiyi əraziyə, tədbirin keçirilmə formasına və ailənin seçimlərinə bağlıdır.
Ən böyük xərclərdən biri geyim və ayaqqabı ilə bağlı olur. Qızlar adətən xüsusi paltar, ayaqqabı və aksessuarlar seçirlər. Oğlanlar isə kostyum və ya klassik geyimlərə üstünlük verirlər. Bu sahədə xərclər təxminən 100-400 manat arasında dəyişə bilər.
Foto və video çəkilişləri də "Son zəng"in vacib hissələrindən biridir. Peşəkar fotoqraf və videoqraf xidmətləri üçün adambaşına təxminən 30-150 manat ödənilə bilər.
Bir çox məktəbdə və ya sinifdə tədbirdən sonra restoran və ya istirahət məkanlarında məclislər təşkil olunur. Bu zaman əlavə olaraq 100-300 manat və ya daha çox xərc yarana bilər.
Bundan başqa, lentlər, çiçəklər, hədiyyələr, bəzək əşyaları və nəqliyyat üçün də müəyyən məbləğ tələb olunur. Bu xərclər ümumilikdə 20-200 manat arasında dəyişə bilər.
Əgər şagird yalnız məktəbdə keçirilən rəsmi tədbirdə iştirak edirsə və əlavə məclis təşkil olunmursa, ümumi xərc 100-300 manat civarında qala bilər. Lakin bahalı geyim, peşəkar çəkiliş və restoran proqramı seçildikdə xərclər 1000 manatı, bəzi hallarda isə daha çox məbləği keçə bilər.
