Bir aydan sonra bahar fəsli qədəmlərini ölkəmizə qoyacaq. Yazın gəlişi ilə havalar da isinir və bu bizim geyimimizə öz təsirini göstərir. Çünki hər fəslin özünəməxsus rəngləri, geyim üslubları, biçimləri, parçaları olur. Düzdür, çoxları özünə yaraşanı, cibinə uyğun gələni geyinsələr də, bir qisim insan moda trendlərini izləyir və öz qarderobunu hər fəslin dəbinə uyğun olaraq yeniləyir.
Artıq bir çox xanımlar yazda nə geyəcəklərini, hansı libasları alacaqlarını fikirləşirlər. Bunun üçün də ilk növbədə həmin vaxt dəbdə nələrin olacağı ilə maraqlanırlar. Əbəs yerə deməyiblər ki, gözəllik ondur, doqquzu dondur.
İnsanoid.com-un əməkdaşı xanımlara bu işdə kömək etmək üçün 2025-ci ilin yaz fəslində dəb rənglərinin hansılar olacağı və bu fəsildə hansı tip modellərə üstünlük veriləcəyini öyrənməyə çalışıb.
Bu işdə bizə tanınmış modelyer-dizayner Şəlalə Maqsudova kömək edib.
[gallery link="file" columns="1" size="full" ids="217527"]
Modelyer ilk olaraq yaz fəslinin rənglərini açıqlayıb:
“2025-ci ilin yazında tünd qırmızı (bardo), qəhvəyi tonlar, tünd yaşıl və zeytun rəngləri daha çox aktual olacaq. Təbii ki, ağ və qara rənglər bütün illərdə və fəsillərdə klassik rəng olaraq hər zaman dəbdədir”.
Ş.Maqsudova yaz fəslinin biçimləri haqqında danışıb:
“Midi ətəkli trapes ətəklər, enli ətəkli midi formada şalvarlar, çiyinli pencəklər və belə nazik kəmərlərlə taxılmış boş biçimli koftalar daha çox dəbdə olacaq”.
Dizayner yazda dəbdə olacaq aksesuarları da açıqlayıb:
“Aksesuar olaraq əlcəklər, nazik tonlu, rəngli şərflər və şlyapalar daha çox istifadə olunacaq”.
Nəzrin Vahid
