Ağsu rayonunun Girdə, Hinqar və Xanbulaq kəndində sakinlərə məxsus 12 baş iribuynuzlu heyvan quduz canavarların hücumuna məruz qalıb. Bu barədə 27 iyun tarixində APA məlumat yayıb.
Sakinlərə 10 min manata yaxın maddi ziyan dəyib. Həmçinin qeyd olunub ki, xəsarət alan heyvanlar quduzluq xəstəliyinə yoluxub.
Kəndlilərin sözlərinə əsasən, bu, son bir ayda canavarların kəndə 5-ci hücumudur. Vəhşi heyvanlar ümumilikdə 19 baş iri buynuzlu mal-qaranı tələf edib.
Onlar bildiriblər ki, canavarlar "Qırmızı kitab"a salındığı üçün onların öldürülməsinə icazə verilmir və öldürənlər 5 min manatla cərimələnir. Bu səbəbdən də kənd ətrafında canavarların sayı sürətlə artır.
Vətəndaşlar məsələ ilə bağlı tədbir görülməsini istəyirlər.
