Ağsu sakini naməlum vəhşi heyvanın hücumuna məruz qalıb. Bu barədə Report 29 noyabr tarixində xəbər verir.
Rayonun Daşdəmirbəyli kəndində kənd sakini, 36 yaşlı Sakit Bağırov gecə küçədə gedərkən naməlum vəhşi heyvan qəflətən onun üstünə hücum edərək sol biləyindən dişləyib. Özünü itirməyən S.Bağırov heyvanın boğazından yapışaraq yerə çırpıb. Lakin heyvan yenidən onun sifətindən yapışıb.
Səs-küyə yaxınlıqdakı evlərdə yaşayan sakinlər köməyə gəliblər. Bu zaman vəhşi heyvan qaçaraq ərazidən uzaqlaşıb.
Yaralı xəstəxanaya çatdırılıb, ona tibbi yardım göstərilib. S.Bağırovun sifətinin müxtəlif nahiyələrinə tikiş vurulub.
Hələlik ona hansı vəhşi heyvanın hücum etdiyi məlum deyil.
Sakinlərin sözlərinə görə, artıq bir neçə ildir ki, gecələr kənddəki həyətlərə vəhşi heyvanlar soxulur, ev heyvanlarına hücum edirlər.
Həmin heyvanların yaxınlıqdakı dağlıq və meşəlik ərazilərdən gəldiyi güman olunur.
[caption id="attachment_96175" align="alignnone" width="640"]
Foto report.az saytı[/caption]
