Demək olar ki, çoxumuz taksi xidmətlərindən istifadə edərkən kartla ödəniş etdiyimizdə sürücünün narazılığı ilə rastlaşmışıq. Bəs bunun səbəbləri nədir? Niyə taksi sürücüləri kartla ödəniş edənləri sevmir? Buna İnsanoid aydınlıq gətirməyə çalışıb.
Bunun üçün ölkəmizdə sərnişindaşıma ilə məşğul olan şirkətlərin birinin xidmətindən istifadə etdik. Sözügedən məsələ ilə bağlı sürücüyə sual verdikdə isə o bildirdi ki, bu, sürücüdən asılıdır: “Əslində mənim üçün fərqi yoxdur. Amma gün ərzində bütün sifarişlər kartla olduqda günün sonuna yanacaq doldurmağa əlimizdə pul olmur. Kartdan da pul nağdlaşdıranda bizdən faiz tutulur”. Onun dediyinə görə, müştəri tərəfindən ödəniş kartla olunanda pulu 2-3 günə əldə etmək olur.
Sözügedən fəaliyyətlə məşğul olan sürücülər şərnişin tərəfindən bank kartı ilə ödənilən pulları nağdlaşdırmaq üçün VÖEN-ə bağlı kart hesabı açdırmalıdırlar.
Taksi xidmətləri göstərən şirkətlər tərəfindən sərnişinlər üçün endirimlər və ya kuponlar təqdim olunursa, gediş üçün qeyd olunan məbləğin endirim hissəsi şirkət tərəfindən sürücünün bank hesabına köçürülür.
Belə qərara gəlmək olar ki, müştəri kartla ödəniş etdikdə sürücülərin əsas problemləri pulun nağdlaşdırılmasında xidmət haqqının tutulmasıdır və gediş haqqının bir necə gündən sonra alınmasıdır.
Mərkəzi Bankın son hesabatına əsasən, cari ilin 3 ayı ərzində ölkədaxili nağdsız əməliyyatların həcmi keçən ilin müvafiq dövrü ilə müqayisədə 2 dəfədən çox artmışdır.
Bu gün, mayın 23-də bəzi KİV-lərdə Bolt şirkəti tərəfindən kartla ödənişi qəbul etməyən taksi sürücülərinin 25 AZN məbləğində cərimələnməsi barədə məlumat yayılıb.
