Atası tərəfindən itkin düşdüyü bildirilən 9 yaşlı kanadalı qızın meyiti ABŞ-nin Nyu-York ştatındakı bir göldə tapılıb və onun boğularaq öldüyü müəyyən edilib.
İnsanoid.com xarici KİV-ə istinadən bildirir ki, 45 yaşlı Luçano Frattolin qızı Melina Frattolinin qətlində və meyitini gizlətməkdə ittiham olunub. Kanadalı kişi özünü günahkar saymadığını bildirib və hazırda dairə həbsxanasında saxlanılır.
Frattolin şənbə axşamı 911 təcili yardım xidmətinə zəng edərək qızının itkin düşdüyünü bildirib. Daha sonra o, polisə deyib ki, guya iki naməlum kişi qızını zorla ağ rəngli bir maşına mindiriblər.
Polis həyəcan siqnalı verərək itkin düşmüş qızcığazın axtarışında ictimaiyyətdən kömək istəyib. Lakin əməliyyatçılar atanın ifadələrində uyğunsuzluqlar aşkar ediblər və qızın oğurlandığına dair heç bir sübut olmayıb.
Ştatın meşə mühafizəçiləri qızın meyitini Tikonderoqanın meşələrindəki bir gölün dayaz hissəsində tapıblar. Cinayət iddiasında qeyd olunub ki, Frattolin qızının meyitini bir kötüyün altında gizlədib.
İlkin ekspertiza nəticələrinə əsasən, ölümün səbəbi “boğulma nəticəsində asfiksiya” olub və Nyu-York ştatı polisi bu hadisəni qətl kimi təsnif edib. Ekspertizanın yekun nəticələri isə hələ təqdim edilməyib.
Polisin verdiyi məlumata görə, ata ilə qız 11 iyuldan etibarən ABŞ-də istirahətdə olublar və həmin həftəsonu Monreala qayıtmalı imişlər. Polis qeyd edir ki, qız anası ilə yaşayırmış və ana 2019-cu ildən bəri Luçano Frattolindən ayrı yaşayır.
Qızın ölümünün başvermə şəraitinə dair istintaq davam edir.
