Polisin Balakəndə keçirdiyi əməliyyat nəticəsində 8 nəfər tutulub, 15 kiloqram narkotik dövriyyədən çıxarılıb. Bu barədə İnsanoid DİN-ə istinadən bu gün, 5 yanvar tarixində xəbər verir.
Balakən rayonu son iki gün ərzində keçirilən tədbirlər nəticəsində narkotik vasitələrin qanunsuz dövriyyəsi ilə məşğul olan 8 nəfər saxlanılıb, onlarda aşkarlanan 15 kiloqram narkotik dövriyyədən çıxarılıb.
Əməliyyat zamanı əvvəlcə əmi oğlanları - Fərman və İsrafil Qarayevlər saxlanılıblar. Şəxsi axtarış zamanı qohumların üzərində marixuana aşkarlanıb. Davam etdirilən tədbirlərlə Fərman Qarayevin yaşadığı ünvanda külli miqdarda narkotik vasitə gizlətdiyi də müəyyən edilib. Onun Gərəkli kəndi ərazisində yerləşən evinə baxış zamanı ümumi çəkisi 14 kiloqrama yaxın olan qurudulmuş marixuana aşkarlanıb.
Araşdırma zamanı saxlanılan şəxsin narkotik vasitəni ötən ilin mart ayında meşəlik ərazidə becərdiyi çətənə kollarından əldə etdiyi məlum olub. Həmin meşə massivinə baxış keçirilərkən oradan narkotik tərkibli bitkilərin hissələri götürülərək istintaqa təhvil verilib.
Polis əməkdaşları tərəfindən keçirilən növbəti əməliyyat-axtarış tədbirləri nəticəsində narkotikləri satmaqda, saxlamaqda şübhəli bilinən daha 6 nəfər rayon sakini – Əsgər Əsgərov, Rizvan Cücüyev, Azər Qardaşov, Kamran Əliyev, Araz Babayev və onun qohumu Nazim Baradov tutulublar. Onlarda külli miqdarda güclü təsiredici narkotik vasitə - heroin və marixuana aşkar edilərək dövriyyədən çıxarılıb.
Saxlanılan şəxslərin əksəriyyəti əvvəllər də eyni əmələ görə məhkum olunublar və onlar izahatlarında narkotiklərin qanunsuz dövriyyəsi ilə məşğul olduqlarını etiraf ediblər.
Faktlarla bağlı cinayət işləri başlanıb.
[caption id="attachment_100387" align="alignnone" width="640"]
Foto DİN[/caption]
