Beyləqan rayonunda bir ailənin 4 üzvünün qətlə yetirilməsi ilə bağlı yeni təfərrüatlar və hadisəni törətməkdə şübhəli bilinən Fuad Cəlilzadənin ittiham edildiyi maddə məlum olub. Bu barədə Report 3 dekabr tarixində məlumat verib.
F.Cəlilzadə barəsində Cinayət Məcəlləsinin 120.2.7-ci (iki və ya daha çox şəxsi öldürmə) maddəsi ilə ittiham irəli sürülüb. O, on dörd ildən iyirmi ilədək müddətə və ya ömürlük azadlıqdan məhrum edilə bilər.
Məlumata görə, ailələr arasında 2010-cu ildən ədavət olub. Qonşular arasında mübahisə isə torpaq üstündə olub.
Həmin il F.Cəlilzadənin atası münaqişə zəminində qonşusu Nadir Quliyevi öldürməyə cəhd edib və o, məhkəmənin hökmü ilə 11 il azadlıqdan məhrum olunub. Lakin 6 il həbs cəzasından sonra azadlığa buraxılıb. Ailələr arasında münasibətlər daha da pisləşib.
Dekabrın 2-də F.Cəlilzadə mübahisə zəminində qonşuları - 51yaşlı Tərgül Quliyevanı, onun həyat yoldaşı, 56 yaşlı Nadir Quliyevi və oğlanları - 26 yaşlı Amin Quluzadəni və 20 yaşlı Xəyal Quluzadəni güllələyərək qətlə yetirib.
F.Cəlilzadə odlu silahdan atəş açaraq həmin şəxslərin hər birinə 2 güllə vurub.
Hazırda istintaq davam edir.
