Britaniyanın tədqiqat şirkəti JATO Dynamics-in məlumatına görə, Çinli avtomobil istehsalçısı BYD bu ilin aprel ayında Avropada Tesla-dan daha çox elektrikli avtomobil satıb. Bu, ilk dəfə baş verir.
İnsanoid.com xarici KİV-ə istinadən xəbər verir ki, BYD 7231 elektrikli avtomobilin (BEV) satışını qeydiyyatdan keçirib, Tesla isə 7165 avtomobil satıb.
“Fərq kiçik görünsə də, bu, dönüş nöqtəsidir. Tesla uzun illərdir ki, Avropa elektrikli avtomobil bazarında lider idi, BYD isə Norveç və Niderland istisna olmaqla, rəsmi fəaliyyətinə yalnız 2022-ci ilin sonunda başlayıb”, – deyə JATO Dynamics qeyd edir.
Avropada elektrikli avtomobillərə tələbat sabit olaraq qalır: aprel ayında satışlar ötən illə müqayisədə 28% artıb, bu artım əsasən Çin avtomobil markaları hesabına baş verib.
Avropa İttifaqının Çin istehsalı elektrikli avtomobillərə qarşı rüsum tətbiq etməsinə baxmayaraq, onların qeydiyyatı bir ay ərzində 59% artıb. Digər elektromobil istehsalçıları isə 26%-lik artım qeydə alıblar.
