Baş Dövlət Yol Polisi İdarəsi sürücülərə və digər hərəkət iştirakçılarına mövcud hava şəraiti ilə bağlı xəbərdarlıq edib. Bu barədə dekabrın 10-da Report məlumat yayıb.
Bildirilib ki, hazırda ölkə ərazisində yağışlı, dumanlı hava şəraiti müşahidə olunur. Bu da yollarda görünüş məsafəsini məhdudlaşdırır və sürücülərə ciddi çətinliklər yaradır.
Həftəsonu bölgələrə və paytaxta səfər edənlərin sayında artım müşahidə olunacağını nəzərə alaraq, şəxsi avtomobillə səfərə çıxan, eləcə də sərnişindaşıma fəaliyyəti göstərən sürücülərə əlverişsiz hava şəraitində daha diqqətli olmaq, sürət həddini nəzarətdə saxlamaq, nasaz nəqliyyat vasitələri ilə yola çıxmaqdan çəkinmək, ötmə və manevr zamanı təhlükəsizlik qaydalarına ciddi əməl etmək tövsiyə olunur.
“Bununla yanaşı, yağışlı havanın xüsusilə moped və motosiklet idarə edən şəxslər üçün təhlükəli olduğunu nəzərə alaraq, sifarişli çatdırılma xidməti göstərən şəxslərdən bu tip nəqliyyat vasitələrindən mümkün qədər az istifadə etmələrini xahiş edirik", - deyə qurumdan vurğulanıb.
