"SpaceX" şirkətinin qurucusu İlon Mask Beynəlxalq Kosmik Stansiyadan səkkiz aydır geri qayıda bilməyən NASA astronavtları barədə sensasiyalı açıqlama ilə çıxış edib. Onun sözlərinə görə, Butç Uilmor və Sunita Uilyams hələ yarım il əvvəl "Dragon" kosmik gəmisi ilə Yerə qaytarıla bilərdilər, lakin ABŞ-nin əvvəlki prezidenti Co Bayden administrasiyası buna qarşı çıxıb.
İnsanoid.com verir ki, "SpaceX" şirkətinin qurucusu bu barədə özünün "X" sosial şəbəkə hesabında bildirib.
"Astronavtlar orada cəmi səkkiz gün qalmalı idilər, lakin artıq səkkiz aydır ki, BKS-dədirlər. "SpaceX" altı ay əvvəl əlavə bir "Dragon" göndərib onları evə qaytara bilərdi, lakin Baydenin Ağ Evi (NASA yox) buna icazə vermədi", - deyə o bildirib.
Maskın sözlərinə görə, ABŞ-nin Prezidenti Donald Tramp onların mümkün qədər tez qaytarılmasını istəyib və hazırda bununla bağlı işlər gedir.
Xatırladaq ki, "Boeing Starliner" gəmisi "Boeing" korporasiyası tərəfindən iyunun 5-də orbitə buraxılıb - bu, onun ilk pilotlu uçuşu olub. Gəminin göyərtəsində astronavtlar Butç Uilmor və Sunita Uilyams olublar. Birləşmə zamanı bir neçə manevr mühərrikinin sıradan çıxması ilə əlaqədar gəmidə nasazlıq yaranıb və onların qayıdış müddəti qeyri-müəyyən vaxta qədər təxirə salınıb.
Nəticədə NASA qərara alıb ki, astronavtlar "SpaceX"in "Crew-9" missiyası ilə 2025-ci ilin yazında Yerə qayıdacaqlar.
Onu da bildirək ki, bir müddət əvvəl Sunita Uilyams və Butç Uilmorun səhhətində problemlər yaranmışdı.
