Kürdəmir rayonunun Qarabucaq kəndinin yolu uzun illərdir ki, bərbad vəziyyətdədir. Bu barədə kənd sakinləri Report-a məlumat veriblər.
Onların sözlərinə görə, qışda palçıqdan, yayda isə tozdan bu yolda hərəkət etmək mümkün deyil.
"Çınqıllı daşlarla salınmış bu kənd yolunun ötən əsrin 60-cı illərində salındığını nəzərə alsaq, üstünə də əsas yol olduğunu əlavə etsək, mövcud vəziyyətin nə qədər ağır olduğunu deyə bilərik. Çəkildiyi gündən indiyədək bir dəfə də olsun əsaslı təmir görməyən, asfalt örtüyü salınmayan bu yolun bir hissəsinə bir neçə dəfə sakinlərin şəxsi vəsaiti hesabına çınqıl döşənib", - deyə bildirilib.
Məsələ ilə bağlı Kürdəmir Rayon İcra Hakimiyyətindən bildirilib ki, sözügedən yolun asfaltlanması 2023-cü ilin planında nəzərdə tutulub.
