Kürdəmir sakinləri su problemi yaşayırlar. Bu barədə APA reportaj hazırlayıb.
Rayonun Qarasu kənd sakinləri əkin sahələrini suvarmağa su tapmırlar. Kənddə içməli su ilə bağlı da çətinliklər çoxdur. Sakinlər hər ay içməli suya 30-40 manat xərcləməli olurlar.
Sakinlərin sözlərinə görə, Qarasuda təxminən 500-600 hektar sahədə taxıl və yonca bu günə kimi suvarılmayıb. Səbəbi isə sakinlər icra hakimiyyətinin yerli nümayəndələrində görürlər: “Həmin şəxslər vəzifələrindən istifadə edib, özlərinə məxsus qeyri-qanuni əkin sahələrini suvarırlar, nəticədə də digər sakinlərə su çatmır”, - deyə bildirilib.
Kürdəmir rayon İcra Hakimiyyətinin Qarasu inzibati ərazi dairəsi üzrə nümayəndəsi Elimdar Zülfiqarov isə bu iddiaların doğru olmadığını deyib.
Məsələyə münasibət bildirən Kürdəmir Rayon Suvarma Sistemləri İdarəsinin bölmə rəisi Fazil Musayev bildirdi ki, adıçəkilən ərazidə suvarma suyu nasoslar vasitəsilə verilir. İşıqların gün ərzində 3-4 dəfə sönməsi səbəbindən suvarma suyunun intensiv şəkildə verilməsini təmin etmək mümkün olmur.
Kürdəmir Rayon Elektrik Şəbəkəsinin baş mühəndisi İxtiyar İmanov isə bu iddiaları əsassız adlandırdı. Onun sözlərinə görə, Qarasu kəndində enerji təchizatı yalnız fövqəladə vəziyyətlərdə dayandırıla bilər.
