Müdafiə Nazirliyinin həbsdə olan Maliyyə və Büdcə İdarəsinin sabiq rəisi, general-mayor Nizami Məmmədovun səhhəti pisləşib. Bu barədə noyabrın 29-da APA xəbər yayıb.
General-mayor Dövlət Təhlükəsizliyi Xidmətinin təcridxanasından Penitensiar Xidmətin müalicə müəssisəsinə köçürülüb. O, hazırda həkim nəzarətindədir.
Məlumatı Nizami Məmmədovun vəkili Rəşad Mirmehdizadə təsdiq edib. Vəkilin sözlərinə görə, bu günə qədər iş üzrə dövlətə dəymiş ziyanın əksər hissəsi ödənilib, qalan hissənin də ödənilməsi davam etdirilir.
Xatırladaq ki, general-mayor Nizami Məmmədov DTX tərəfindən həbs edilib. Məlumata görə, Nizami Məmmədov 80 milyon 600 min manat mənimsəməkdə təqsirləndirilir.
