Qaraheybətdə hərbi helikopterin qəzaya düşməsindən bir il ötür

Dövlət Sərhəd Xidmətinin hərbi helikopterinin Xızı rayonu ərazisində yerləşən “Qaraheybət” aviasiya poliqonunda təlim uçuşları yerinə yetirərkən qəzaya uğramasından bir il ötür.

Hadisə 2021-ci il 30 noyabrda saat 10:40 radələrində baş vermişdi. Qəza nəticəsində 14 nəfər həlak olub, 2 nəfər isə yaralanıb.

Həlak olan hərbi qulluqçuların adları:

polkovnik Cavadov Fizuli Əli İbram oğlu;

polkovnik Nəzirov Emil Nəzir oğlu;

mayor Həsənov Elmir Mircəlil oğlu;

mayor Əhmədov Elbrus Səmrəddin oğlu;

mayor Mayılov Emil Şahid oğlu;

mayor Məmmədov Murad Yaşar oğlu;

mayor Əliyev Emil Elman oğlu;

tibb xidməti kapitanı Əhmədxanov Ceyhun Xanlar oğlu;

kapitan Bayramlı Cavid Əhliman oğlu;

kapitan Əliyev Xəyyam Əlixan oğlu;

kapitan Qaraisayev Teymur Ənvər oğlu;

leytenant Süleymanov Abdulla Telman oğlu;

baş leytenant Nağıyev Fərid Təyyar oğlu;

işçi Nəbiyev Elçin Fikrət oğlu.

Hadisə zamanı polkovnik-leytenant Cəfərov Emil Məmməd oğlu və kapitan Ədilov Ramin Ramiz oğlu yaralanıblar.

Helikopter havaya qalxdıqdan 16 dəqiqə 59 saniyə sonra marşrut üzrə meydançaya eniş etmək qərarı qəbul edilib, həmin vaxt helikopterin sürəti 141 km/saat, radiohündürlük 101 metr olub.

Uçuşun 17-ci dəqiqə 10-cu saniyəsində küləyin istiqamətinin düzgün nəzərə alınmadan eniş prosesinə başlanılması nəticəsində helikopterin uçuş parametrlərində əhəmiyyətli dərəcədə dəyişikliklər baş verib və uçuş sürəti 0 km/saat, radiohündürlük 89 metr qeydə alınıb. Pilotlar helikopteri qəza vəziyyətindən çıxarmaq üçün cəhd etsələr də, buna nail ola bilməyiblər.