Qobustan Milli Tarix-Bədii Qoruğu məktəblilər üçün yeni layihə - “Muzey mədəniyyəti məktəbdən başlayır” yarışmasını təşkil edir. Bu barədə dekabrın 3-də Azərtac xəbər yayıb.
Qoruq ərazisində yerləşən muzeyi və abidələri ziyarət edən məktəblilər ziyarət zamanı burada kollektiv şəkil çəkdiriblərsə, fotoşəkilləri dekabrın 10-dək qoruğun [email protected] e-mail ünvanına göndərməklə yarışa qatıla bilərlər.
Yarışın şərtlərinə əsasən, qoruğun sosial şəbəkə hesablarındakı səhifədə bəyənmə və paylaşma sayı daha çox olan məktəbli kollektivinin fotosu qalib hesab olunacaq və onlara həvəsləndirici hədiyyələr təqdim ediləcək.
Yarışmanın məqsədi Qobustan abidələrinin məktəblilər arasında daha geniş şəkildə təbliğindən ibarətdir.
Yarışın qalibi dekabrın 15-də elan olunacaq.
