Qubada 5 il əvvəl törədilən qətlin üstü açılıb. Bu barədə mayın 20-də Baş Prokurorluq və Daxili İşlər Nazirliyi birgə məlumat yayıb.
Belə ki, Qubanın Küpçalqışlar kəndi ərazisindəki Qudyalçayın üzərindəki körpünün altında yandırılan "VAZ-2106" markalı avtomobilin içərisində Xaçmaz rayon sakinləri - 1984-cü il təvəllüdlü Rəhman İşıqov və 1998-ci il təvəllüdlü Ülviyyə Məmmədovanın yanmış meyitləri aşkar edilib.
Cinayətkarı müəyyən etmək mümkün olmadığından 7 iyul 2017-ci ildə iş üzrə icraat dayandırılıb.
2022-ci ilin aprelin 25-də iş üzrə icraat təzələnib. Xaçmaz rayon sakini, 1994-cü il təvəllüdlü Osman Ömərov saxlanılıb.
O, mübahisə zamanı Ülviyyə Məmmədovanı deşici alətlə vurub ona xəsarət yetirməsindən sonra Rəhman İşıqova da bıçaqla xəsarətlər yetirib. Cinayətin izini itirmək üçün qəza görüntüsü yaratmaq məqsədilə meyitləri avtomobilin içərisində qoyub və yandırıb.
