Qurban bayramında mədə-bağırsaq xəstəliklərindən əziyyət çəkən insanlar qidalanma zamanı bəzi vacib məqamlara diqqət etməlidirlər. Bununla bağlı iyulun 5-də Səhiyyə Nazirliyinin mütəxəssisi Emin Məmmədov açıqlama verib.
Onun sözlərinə görə, qızardılmış ət və ət məhsullarının çox istifadəsi qastrit, xora xəstəliyinin kəskinləşməsi ilə nəticələnə bilər. Həmçinin mədəaltı vəz və öd daşı xəstəliklərindən əziyyət çəkənlərdə bayram günlərində kəskin ağrılar ola bilər.
“Yağlı ət məhsulları və soyuq içkilərin birgə qəbulu zamanı ishal, kəskin qarın ağrıları, ürək bulanma və qusma hallarına tez-tez rast gəlinir. Bu da həzm sisteminə ciddi şəkildə mənfi təsir göstərir”, - deyə ekspert vurğulayıb.
Həkim yay aylarında və bayram günlərində tərəvəzlərlə zəngin qidalanmağı və çətin həzm olunan ət yeməklərini azaltmağı tövsiyə edib.
