Ramazan ayı başa çatdıqdan sonra, aprelin ilk günlərindən toy bazarında canlanma müşahidə olunur. Ancaq bu canlanma qiymətlərdə özünü daha çox biruzə verir.
Menyu qiymətlərinin əvvəlki illərə nisbətən kəskin şəkildə bahalaşması ilə bağlı sosial şəbəkələrdə məlumatlar var. Bunu bəziləri Ramazan ayına görə sifarişlərin azlığı ilə əlaqələndirirlər.
Maraqlıdır, restoranlarda menyu qiymətləri həqiqətənmi bahalaşıb?
Bununla bağlı İnsanoid.com–un əməkdaşı restoranlar arasında sorğu keçirib.
Şadlıq saraylarından birinin səlahiyyətlisinin sözlərinə görə, çalışdığı restoranda toy etmək üçün adambaşına minimum 50 manat ödəmək lazımdır:
“Bizim şadlıq sarayımızda menyu qiyməti ziyafətdə iştirak edəcək şəxslərə görə dəyişir. Ramazan ayı bitən gün mərasimlər başladı. Müraciət edənlərin sayı artdı. Tələbat kifayət qədərdir. Menyunun adambaşına maksimum qiyməti isə 65-70 manat arası dəyişir. Bu qiymətin o qədər də yüksək olduğunu düşünmürəm”.
Digər bir şadlıq sarayından verilən məlumata görə, menyu qiymətlərində heç bir dəyişiklik yoxdur:
“Biz hər zaman insanların maddi vəziyyətini düşünürük. Onlara nəyin uyğun olub-olmaması bizim üçün önəmlidir. Amma bahalaşma səbəbindən biz də illər əvvəlki qiymətləri təqdim edə bilmərik. Məsələn, bir neçə il əvvəl menyuda adambaşına 25-30 manat qiymət qoyulmuşdusa, indiki standartlar və bahalaşma 55-60 manat qiyməti məcbur edir. Tələbat da pandemiyadan sonra xeyli azalıb. Onun da təsiri var. Toy bazarında sanki ümumi durğunluq var”.
Başqa bir restoran səlahiyyətlisi toyda iştirak edən şəxslərin sayının azlığından xüsusilə şikayətlənib:
“Əvvəlki illərə nisbətən göstərici çox aşağıdır. Qiymətlərlə ayaqlaşa bilmirik. Bazar od tutub yanır. Məcbursan ki, qiymətləri qaldırasan. O zaman da müştəri olmayacaq. Qiymət bizdə hər kəs kimi standartdır”.
O, toylara maksimum 100-150 nəfər çağırıldığını deyib:
“Bizdə qiymətlər 65 manatdan başlayır. İndi toy edən də, biz də ziyana düşürük. Çünki toya salınan 50 manat əvvəlki illərdəki 50 manatla bir deyil. Bununla yanaşı, indi camaat 100-150 nəfərlə toy edir. Bu da koronavirus pandemiyasına görə sərt karantin rejimindən qalma vərdişdir. İndi 200-300 nəfərlik toy edən yoxdur”.
Restoranlardan birindən isə iaşə obyekti istifadəyə veriləndən menyu qiymətlərində dəyişiklik etmədikləri bildirilib:
“Bu şadlıq sarayı açılandan minimum qiymət 70 manat üzərindədir. İllər boyu da bu şəkildə işləmişik”.
Şadlıq sarayı səlahiyyətlisi həftəsonlarına edilən sifarişlərin çoxluğundan danışıb:
“Əsasən, həftəsonlarında müraciət edirlər. Həftəiçi daha azdır. Menyu qiymətləri münasibdir. 55-60 manatdan başlayır”.
Nəzrin Vahid
