Şabran şəhərinin mərkəzi küçələri bərbad vəziyyətə düşüb. Bu barədə Report 28 noyabr tarixində məlumat verib.
Şəhər sakinlərinin sözlərinə görə, bərbad vəziyyətə düşən yollar şəhərin M.Əsədov, Babək, F.Əmirov, Nizami, Şəhid Ü.Orucov, R.Rza, X.Məmmədov, İstanbul, İzmir və "5 sotlar" yaşayış massivinin küçələridir.
Uzun illərdir davam edən bu problemin əsas səbəbi bu küçələrin qış aylarında bataqlığa çevrilməsidir.
Küçələr təmir olunmadığından bir qədər yağış yağan kimi ərazi keçilməz olur. Sakinlər bildirirlər ki, küçələrin şəhərin mərkəzində yerləşməsinə baxmayaraq asfaltlanmaması bir sıra problemlərə yol açıb. Nə piyadalar, nə də avtomobillər burada rahat şəkildə hərəkət edə bilmirlər.
Məsələ ilə bağlı Şabran Rayon İcra Hakimiyyətinin şəhər inzibati ərazi dairəsi üzrə nümayəndəliyindən bildirilib ki, cari ildə M.Əsədov və F.Əmirov küçələrində çınqıl materialla yol təmir işləri aparılıb, növbəti ildə də həmin küçələrdə yol təmiri işləri aparılacaq:
"Bundan əlavə, Nizami küçəsi də asfaltlanıb. Lakin həmin küçəyə məxsus ara yollara örtük çınqıl materialı döşənib. Növbəti il yol təmirində qalan ara yollar da asfaltlanacaqdır. Babək küçəsinin asfalt örtüyündə isə yaranmış çala-çökmələr növbəti ildə təmir olunaraq aradan qaldırılacaq. "5 sotlar" deyilən ərazi isə 22 küçədən ibarətdir. Həmin ərazidə yerləşən küçələrdə yolların təmiri hər il aparılır. Belə ki, Şəhid Ü.Orucovun adını daşıyan küçə bu il asfaltlanıb. R.Rza, X.Məmmədov, İstanbul, İzmir küçələrinə çınqıl material tökülərək yayılıb".
Nümayəndəlikdən həmçinin vurğulanıb ki, küçələrin təmir-bərpa işləri bundan sonra da davam etdiriləcək.
[caption id="attachment_95986" align="alignnone" width="640"]
Foto Report.az saytı[/caption]
