Səhiyyə Nazirliyi qripin daha çox kimlər üçün təhlükə yaratdığını açıqlayıb. Bu barədə dekabrın 9-da Report-a nazirliyin mütəxəssis-eksperti, həkim-infeksionist Təyyar Eyvazov bildirib.
Onun sözlərinə görə, risk qrupuna uşaqlar və qocalar, hamilə qadınlar, tibb işçiləri, məktəbəqədər tədris müəssisələrində xidmət göstərən heyət, həmçinin daxili orqanların xroniki xəstəlikləri və yaşından asılı olmayaraq, immun çatışmazlığı olan şəxslər daxildir.
Ümumiyyətlə, qripin fəsadları iki qrupa bölünür. Birinci qrupa hemorragik ödemi, meningit, meningoensefalit, toksik şok aiddir. İkinci qrup ağırlaşmalar isə xəstəliyin sonrakı 4-5-ci günündə meydana çıxır və adətən, bakterial infeksiyanın qoşulması ilə əlaqədar olur. Ən təhlükəli və tez-tez baş verən ağırlaşma pnevmoniyadır.
