Uşaqlarda immun sistem böyüklərlə müqayisədə nisbətən zəifdir. Bunun səbəbi onlarda immun sisteminin tam formalaşmamasıdır. İlk 6-7 il immun sisteminin aktiv inkişaf etdiyi dövrdür. Bu yaşa qədər olan uşaqlar, xüsusən də payız-qış mövsümündə, tez-tez xəstələnirlər. Bunu Səhiyyə Nazirliyinin mütəxəssis-eksperti, pediatr Əkbər Quliyev deyib.
Bu barədə 5 yanvar tarixində Report məlumat verib.
O, bu kimi halların qarşısını almaq üçün valideynlərə bəzi tövsiyələr və məsləhətlər verib: "Ana südünün uşaqlarda immun sisteminin yaradılması və gücləndirilməsində birbaşa əlaqəsi var. Bu səbəbdən ilk 6 ayı ancaq ana südü ilə qidalanmaq çox önəmlidir. İstər xəstəlik dövrü, istərsə də sağlam zamanda yetəri qədər maye qəbul edilməsi şərtdir”.
Pediatrın sözlərinə görə, qidalanma qədər yuxu da uşaqlar üçün çox önəmlidir. Hər bir uşaq gün ərzində 8-11 saat yatmalıdır.
“Bundan əlavə, əllərin düzgün və təmiz yuyulmasına diqqət yetirmək vacibdir. Xəstəliklərin çoxu hava-damcı yolu ilə yayılır. Buna görə də insanların çox olduğu qapalı, havasız məkanlardan uzaq olmaq lazımdır. Otaqların havası tez-tez dəyişdirilməlidir", - həkim əlavə edib.
