Şəmkir sakinlərindən 10 kiloqramdan çox narkotik götürülüb. Bu barəd’ dekabrın 5-də Report məlumat yayıb.
Belə ki, İrandan qeyri-qanuni yolla Şəmkir rayonuna gətirilmiş narkotik vasitəni onlayn sifariş kimi qəbul edərək ölkə ərazisində çatdırılmasını təmin edən narkokuryerlər saxlanılıblar.
Məlum olub ki, rayon sakinləri - Elşad İbrahimov və Nurəddin Hüseynov rayon ərazisində gizlədilən narkotik vasitəni 12 000 manat pul və bir miqdar narkotik vasitə qarşılığında ölkənin Gürcüstanla sərhəd rayonlarına aparmağa razılaşıblar.
Onlarda 8 kiloqram 122 qram heroin, 2 kiloqram 297 qram tiryək, 111 qram metamfetamin və 300 ədəd metadon həbi aşkar olunaraq götürülüb.
E.İbrahimovun daha əvvəllər də İran vətəndaşı ilə cinayət əlaqəsinə girərək kiçik həcmdə narkotik transferi etməsi məlum olub.
Faktla bağlı araşdırmalar davam etdirilir.
