“TikTok”da bahalı mobil telefonları dəyərindən ucuz qiymətə satdığı barədə elanlar yerləşdirərək ona müraciət edənləri aldadan şəxs saxlanılıb. Bu barədə İnsanoid DİN-ə istinadən bu gün, 30 dekabr tarixində xəbər verir.
Paytaxt ərazisində polis əməkdaşları tərəfindən keçirilən növbəti əməliyyat-texniki tədbirlər nəticəsində sosial şəbəkələrdə dələduzluq edərək insanları aldadan, həmçinin bank kartlarından oğurluqlar edən şəxslər saxlanılıblar.
“TikTok” sosial şəbəkəsində bahalı mobil telefonları dəyərindən ucuz qiymətə satdığı barədə elanlar yerləşdirərək ona müraciət edənlərdən beh adı altında müxtəlif məbləğlərdə pul alan və daha sonra həmin şəxsləri aldadan Nihat Qurbanov tutulub. O, ifadəsində bu yolla təqribən 45-50 nəfəri aldatdığını və pul aldığı şəxsləri sonradan onunla əlaqə saxlamamaları üçün bloka atdığını bildirib.
Həyata keçirilən növbəti əməliyyatlar zamanı isə özünü hotel əməkdaşı kimi təqdim edərək taksi sürücülərinə qarşı dələduzluq edən və onların hesabından öz kartına pullar köçürən Əli Dadaşov tutulub. Bu şəxsin də dələduzluq yolu ilə 10-dan artıq taksi sürücüsünü aldatdığı məlum olub.
Paytaxtda polisin həyata keçirdiyi növbəti əməliyyatlar zamanı isə vətəndaşların kartlarındakı pul vəsaitlərini müxtəlif üsullarla ələ keçirən Rüfət Yusifov, Amin və Ramil Əliyev qardaşları tutulublar.
Saxlanılan şəxslərin paytaxt ərazisində digər analoji cinayətlər etdikləri istisna olunmur.
Aşkar edilmiş faktlarla bağlı araşdırmalar davam etdirilir.
