Ucarda narazı valideynlər tədris ocağının qarşısında aksiya keçiriblər. Bu barədə 20 dekabr tarixində APA məlumat verib.
Əziz Əliyev adına Qazyan kənd 2 nömrəli tam orta məktəbi istismar müddətini başa vurduğundan bina qəzalı vəziyyətə düşüb. Buna görə də yeni məktəb binasının tikintisinə qərar verilib. Şagirdlər isə müvəqqəti olaraq qonşu Qarabörk kənd tam orta məktəbinə köçürülüblər.
Valideynləri narahat edən əsas məsələ övladlarının 2-ci dərəcəli Ucar-Zərdab yolunun üstündə yerləşən Qarabörk məktəbinə gediş-gəlişidir. Sakinlərin sölərinə görə, bu yolla piyada məktəbə getmək çox təhlükəlidir. Sürətli avtomobil yolu ilə azyaşlı uşaqların gediş-gəlişi bədbəxt hadisələri qaçılmaz edir. Buna görə də qonşu kənddə təhsil almalı olan 260 şagirdin əksəriyyəti məktəbə getməyib.
Valideynlər deyir ki, məktəb şagirdi üçün 5-6 kilometrlik yolu piyada getmək çox çətindir.
Bu səbəbdən də valideynlər Qarabörk kənd orta məktəbinin qarşısına toplaşaraq, müvafiq orqanlardan şagirdlərin daşınmasının təmin olunmasını tələb ediblər.
Məktəbin direktoru Firadə Ələkbərova bildirib ki, gələn ayın 1-ci ongünlüyünə kimi şagirdlərin daşınması təmin olunacaq.
