Əksər valideyn və şagirdlər məktəb bufetlərindəki yeməklərin keyfiyyətindən narazıdırlar. Bu barədə APA 3 dekabr tarixində məlumat verib.
Şikayətlərin böyük hissəsi bufetlərdəki yeməklərin qiyməti ilə keyfiyyətinin uyğun gəlməməsi il’ bağlıdır.
Keçirilən sorğu da bu faktı təsdiqləyib.
Şagirdlərin bəziləri həmin yeməklərdən sonra özlərini pis hiss etdiyini, ürək bulantısı verdiyini bildirirlər. Valideynlərin bir qismi qiymətlərin yüksək olduğunu, digər qismi isə övladlarının bufet yeməklərini tərcih etmədiyini qeyd edib.
Sağlam qidalanma mütəxəssisi Məhsəti Hüseynova bildirdi ki, məktəb bufetlərində satılan qidaların keyfiyyəti sual altındadır. Buna sübut kimi məktəblərdə baş verən zəhərlənmələr və yaxud qəfil ölüm hallarını misal göstərmək olar: “Çünki bir çox hallarda məktəb bufetlərində əvvəllər sadəcə günlük yeni bişirilən bulkalar və yaxud digər məhsullar olurdusa, bu gün məktəb bufetlərində rəf ömrü uzun olan və yaxud sağlamlıq üçün həddindən artıq zərərli olan suxariklər, çipslər və yaxud un məmulatları var ki, bunlar 6 ay, bəzən də 1-2 il rəf ömrü olan qidalardır. Və bir çox hallarda da 1-ci növbədə təhsil alan şagirdlər var ki, bunlar səhər yeməyi etmədən məktəbə gedirlər, belə olan halda da artıq saat 11-12 radələrində əlçatan nə varsa, həmin qidalar ilə qidalanırlar”.
Mütəxəssislər onu da məsləhət görürlər ki, istənilən halda bufetlərdən aldığımız məhsulun tarixinə, saxlanma şəraitinə diqqət etməliyik. Uşaqlara da bu vərdiş aşılanmalıdır. Əks halda övladlarımızın sağlamlığına təhlükə yarana bilər.
