Sosial şəbəkədə tanış olduğu qadına qarşı dələduzluq edən 1984-cü il təvəllüdlü Anar Quliyev (soyad-şərtidir) 3 il 6 ay müddətinə azadlıqdan məhrum edilib. Bu barədə 12 noyabr tarixində APA məlumat verib.
Məlumata əsasən, Anar Nərgiz Məmmədova (ad-soyad şərtidir) ilə tanış olan zaman özünü Xüsusi Təyinatlı Qüvvələrin keçmiş mənsubu kimi təqdim edib. O, Vətən müharibəsi başlayan zaman Nərgizə zəng edərək, guya döyüşə çağırıldığını bildirib.
Vətən müharibəsi başa çatandan sonra onlar görüşüblər. Anar ilk tanışlıq zamanı özünü Xarici Kəşfiyyat Xidmətinin “Yarasa” adlı xüsusi təyinatlı dəstəsinin xidmət vaxtı yaralanması səbəbindən ehtiyata çıxmış zabiti kimi təqdim edib. 2021-ci ilin yanvar ayının 28-də Anarın anası Nərgiz üçün elçi gedib, lakin qızın valideynləri düşünmək üçün vaxt istəyiblər.
Qeyd olunub ki, ana da oğlunun yalanına şərik çıxıb və övladının zabit olduğunu təsdiqləyib. Əslində isə Anar özəl şirkətlərin birində mühafizəçi işləyirmiş.
Anar Nərgizlə münasibətdə olduğu dövrdə onu DTX-də işə düzəldə biləcəyini deyib, bunun üçün kurslara qatılmalı olduğunu qeyd edib. O, bu səbəbdən Nərgizdən ümumilikdə 10 000 manata yaxın pul alıb.
2021-ci ilin sonlarında isə Nərgizin Anarla münasibəti pozulub. Qadın aldadıldığını başa düşüb və bu barədə hüquq-mühafizə orqanlarına şikayət edib.
Anar Quliyev daha öncə də məhkumluq həyatı yaşayıb.
