Boliviyadakı Amazon cəngəlliyində yoxa çıxan təyyarənin sərnişinləri bataqlıqdan tapılıb.
İnsanoid.com xarici KİV-ə istinadən xəbər verir ki, pilot, üç qadın və bir uşağı daşıyan yüngül təyyarə ötən həftə qəzaya uğrayıb. Lakin xilasedicilər təyyarənin sərnişinlərini qəzadan 2 gün sonra bataqlıqdan tapıblar.
Ciddi xəsarət alan olmayıb. Bütün bu müddət ərzində insanlar şokolad və manok unu ilə qidalanıblar.
"Biz bataqlığa düşdük və onun düz yanında timsah yuvası var idi. Amma təyyarədən axan yanacaq suyu çirkləndirdi və onun kəskin qoxusu yırtıcıları qorxutdu, onlar hücum etmək üçün bizə yaxınlaşmadılar", - deyə xilas edilən 27 yaşlı pilot Pablo Andres Velarde bildirib.
Sərnişinlərdən biri Mirta Fuentes etiraf edib ki, o, hələ də təyyarə qəzasında sağ qaldığına inana bilmir.
Məlumata görə, təyyarə bir qrup balıqçı tərəfindən aşkar edilib. Onlar Beni departamentindəki İqnasio Muiba körpüsünün yaxınlığında kömək çağırışları eşidiblər. Sərnişinlər xəstəxanaya yerləşdirilib.
