Sosial şəbəkələrdə son zamanlar onlayn şəkildə fala baxanların sayı artıb. Onlayn şəkildə fala baxma xidmətlərinin artması ilə yanaşı, bəzi insanlar bu platformaları dələduzluq məqsədləri üçün istifadə edirlər. Bu cür hallar çox vaxt “onlayn falçılıq” adı altında baş verir. Hətta 10 manata fala baxılır. İnsanlar bu xidmətlərdən faydalanmaq istəyəndə, çox zaman şəxsi həyatlarına dair həssas məlumatları paylaşırlar, bu da dələduzlar üçün fürsət yaradır.
Bəs görəsən, “onlayn falçı”-ların qarşısını almaq üçün tədbirlər keçirilirmi? Şəriət buna nə deyir?
Mövzu ilə bağlı İnsanoid.com-a Qafqaz Müsəlmanları İdarəsi Qazilər şurasının üzvü hacı Surxay Məmmədli açıqlama verib.
O, bildirib ki, falçılıq müqəddəs Qurani-Kərimin birbaşa məzəmmət etdiyi işlərdəndir:
“Falçılığa müraciət bütün dövrlərdə və cəmiyyətlərdə zaman-zaman olub. Bunlar birbaşa şeytanın vəs-vəsəsiylə əlaqədardır. İnsan məchul olan gələcəyə hər zaman maraq göstərib. Allah -Təalanın verdiyi, dəyişkən olan qəzavü-qədəri savab olan əməllərlə dəyişməkdənsə, 
şeytanın təkidi ilə qadağan və məzəmmət olunmuş işlərlə yoldan çıxır. Müsəlman cəmiyyətləri fal və sehr kimi mövzularda əcnəbi mədəniyyətlərin, inancların təsirə altına düşmüş, bu hallar get-gedə artıb.
Şübhəsiz ki, burada insanın gizli olana, bilinməyənə qarşı hiss etdiyi marağın, gələcəkdə özü və ətrafı haqqında bilinməyənləri bilmək istəyinin böyük rolu vardır. Bu işlər haram buyurulmuş işlərdir. Düşünülməmiş kor-koranə atılan addımlardır. İşlərin yolunda getməsi və yaxud həyatda nailiyyətlər qazanılmasının ən gözəl yolu duadır. İnsan yalnız və yalnız Allah -Təalaya bəndəliyini göstərərək öz duası ilə kamala çatar və bununla istədiklərinə nail ola bilər.”
DİN-in Mətbuat Xidmətinin bölmə rəisi Nurlan Əliyev məsələ ilə bağlı bildirib ki, internet resursları, eləcə də informasiya telekommunikasiya şəbəkələrindən istifadə etməklə qanunsuz olaraq qumar və mərc oyunları təşkil edən şəxslərlə bağlı polisə daxil olan hər bir müraciət araşdırılır:
“Daxil olmuş məlumatlar əsasında polis əməkdaşları tərəfindən həmin şəxslərin qanunsuz hərəkətlərinin qarşısının alınması istiqamətində əməliyyat-texniki tədbirlər görülür.
Elə bunun sübutu kimi bir müddət əvvəl Nazirliyin Kibercinayətkarlıqla Mübarizə Baş İdarəsinin sosial şəbəkələrin Azərbaycan seqmentində onlayn qumar oyunları təşkil edən dəstənin üzvlərinə qarşı həyata keçirdiyi genişmiqyaslı əməliyyatı qeyd etmək olar. Həmin 
tədbir zamanı sosial şəbəkələrdə kazino, qumar və mərc oyunları təşkil edən dəstənin başçıları da daxil olmaqla bu qanunsuz əməlləri təşkil və təbliğ edən 30 nəfərə yaxın şəxs saxlanılıb. Qeyd edilən əməliyyat barədə ictimaiyyətə geniş məlumat təqdim edilib.
Bir daha vətəndaşlara qanunsuz mərc, loto və digər qumar oyunları adı altında sosial şəbəkələrdə təşkil edilən oyunlarda iştirak etməməyi tövsiyə edirik”.
Həmin görüntüləri təqdim edirik:
Посмотреть эту публикацию в Instagram
Nəzrin Vahid
