Məlum olduğu kimi, meyxanaçı Xəyyam Əhmədli ötən gecə dünyasını dəyişib.
Titul.az meyxanaçının həyat yoluna dair material hazırlayıb.
Sözügedən məlumatları təqdim edirik:
1980-ci ildə Bakının Xətai rayonunun Əhmədli qəsəbəsində anadan olan Xəyyam Əhmədli, ailəli olsa da, övlad sahibi olmamışdı. Ali təhsil almasa da, söylədiyi meyxanalar və bəstələdiyi musiqilər hər zaman dinləyicilərin qəlbinə toxunub.
Ona geniş tanınma gətirən əsəri, Azərbaycan Ordusunun zabiti Ramil Səfərovun Macarıstanda həbsdə olduğu illərə ithaf etdiyi "Məmləkətim" və ya "Hələ oğlun salamatdır" adlı musiqisi oldu. Bu əsəri ona ölkə daxilində böyük şöhrət qazandırdı.
2018-ci ildə ürək damarlarına müdaxilə (anju) əməliyyatı olunan Xəyyam Əhmədli, 2023-cü ildə isə insult keçirmişdi. Səhhəti ilə əlaqədar dəfələrlə xəstəxanada müalicə almışdı. Verdiyi müsahibələrin birində bildirib ki, illər əvvəl ürəyinə su yığılması diaqnozu qoyulmuş və əməliyyat tövsiyə olunmuşdu, lakin bu müdaxilə həyata keçirilməmişdi. Bir gün qəfil huşunu itirərək xəstəxanada ayıldığını xatırlayırdı.
Onun sağalması üçün 130 min dollar dəyərində tibbi cihaz tələb olunurdu. Cəmi müalicə və əməliyyat xərcləri 150 min dollar təşkil edirdi. Avqust ayında yataq xəstəsi olan Xəyyam yerimək qabiliyyətini itirmiş, bir ayağı isə tamamilə fəaliyyətini dayandırmışdı. Həmin ayın 18-də kliniki ölüm keçirib, 20 dəqiqə müddətində ürək fəaliyyəti dayanmışdı. Bu hal barədə yalnız üç gün sonra məlumat əldə etmişdi.
Bədənində ürək çatışmazlığı səbəbindən su yığılmışdı. Xəstəxanada müalicə aldığı bir il ərzində səkkiz dəfə yatmışdı. Ona lazım olan 150 min dolların çatışmayan 60 minlik hissəsi xeyirxah bir şəxs tərəfindən ödənmişdi.
Hər kəs onun sağalacağına ümid bəslədiyi bir vaxtda, özü də "Yaşamaq istəyirəm. Həyatda dərd varsa, çarəsi də var" deyərək ümid dolu danışırdı. Lakin həmin gecə, 44 yaşında, yaşadığı mənzildə həyatla vidalaşdı.
