Məşhurların hər zaman deyib-güldüyü, əyləndiyi, vur-çatlasın etdiyi şou aləmində zaman-zaman hüznlü anlar da yaşandı. Bir çox tanınmış sənətçi məhs bu il dünyasını dəyişdi. Onlar arasında məşhur müğənnilər, meyxanaçılar və aktyorlar var.
Baku.ws oxuculara bu il vəfat edən azərbaycanlı sənət nümayəndələrinin siyahısını təqdim edir:
Yeni il qədəm qoyar-qoymaz ilk vəfat edən məşhur, Əməkdar artist Aygün Bəylər oldu. Onun vəfatı bütün sənət aləmini və sevənlərini yasa boğdu. 48 yaşlı muğam ifaçısı Ankarada xərçəng xəstəliyindən dünyasını dəyişdi. Sənətçi Suraxanı qəbiristanlığında dəfn olundu. Əməkdar artistin məzarı üzərində abidəsi qoyuldu.
2024-cü ilin yanvarında dünyasını dəyişən digər məşhur Əməkdar artist Gülbahar Şükürlü oldu. 62 yaşlı qarmon ifaçısı xərçəng xəstəliyindən vəfat etdi. Musiqiçi Buzovna qəsəbəsində həyat yoldaşı Zahid Şükürovun qəbiri yanında torpağa tapşırıldı.
Bu il Əməkdar artist Cavanşir Məmmədovun qəfil ölümü də hamını kədərləndirdi. Sənətçi bu ilin aprelin 20-də ürəktutmasından dünyasını dəyişdi. Sənətçi "Qurd qapısı" qəbiristanlığında anası Gülü Məmmədovanın yanında dəfn olundu.
2024-cü ildə sənət aləmi iki meyxanaçısını itirdi. Bunlar Elnur Valeh və Xəyyam Əhmədli idi.
Meyxanaçı Elnur Valeh bu ilin iyulunda vəfat etdi. O 16 il idi ki, şəkərli diabet, xroniki böyrək çatışmazlığından əziyyət çəkirdi, dializ müalicəsi alırdı. Meyxanaçı iyulun 8-də yerləşdirildiyi xəstəxanada komaya düşdü və həyatını itirdi. Sənətçi Lənkəranda, Böyük Bazar qəbiristanlığında dəfn edildi.
Vəfat edən digər meyxanaçı isə Xəyyam Əhmədlidir. O, 2023-cü ildə insult keçirib, ağır ürək problemləri ilə üzləşmişdi. Əməliyyat olunması üçün 70 000 AZN-dən çox pul yığıldı. Lakin meyxanaçının ömrü buna çatmadı. Xəyyam qəfil vəfat etdi. Meyxanaçı Əhmədli kənd qəbiristanlığında torpağa tapşırıldı.
İllərdir Cəlil Məmmədquluzadə adına Naxçıvan Dövlət Milli Dram Teatrında fəaliyyət göstərən Xalq artisti Tofiq Mövləvi də bu ilin mayında vəfat etdi. 86 yaşlı aktyor 60 illik karyerası ərzində 100-dən çox tamaşada müxtəlif obrazlara həyat verib. Bunlar arasında "Qız atası", "Şeyx Sənan", "Ana", "O olmasın, bu olsun", "Atabəylər" kimi əsərlər var.
Xalq artisti Şahlar Quliyev bu ilin oktyabrın 26-da vəfat edib. Opera müğənnisi uzun sürən xəstəlikdən sonra dünyasını dəyişib. Mərhumla vida mərasimi Təzə Pir məscidində keçirilib. Sənətçi "Qurd qapısı" qəbiristanlığında dəfn edilib. Şahlar Quliyev uzun illər Azərbaycan Dövlət Akademik Opera və Balet Teatrının solisti olub. O, 2005-ci ildə Xalq artisti fəxri adına layiq görülüb, Prezident təqaüdçüsü idi.
Əməkdar artist Kifayət Gəncəli bu ilin sentyabrında ürək çatışmazlığından vəfat etdi. Sənətçi doğulub boya-başa çatdığı Gəncə şəhərində torpağa tapşırıldı. Onun Azərbaycan Televiziyasının Qızıl fondunda 300-ə yaxın səs yazısı qorunub saxlanılır.
Bu il dünyasını dəyişən məşhurlardan biri də Əməkdar artist Rafiq İbrahimovdur. O sentyabrda uzun sürən xərçəng xəstəliyindən sonra vəfat etdi. Əməkdar artist Bakı Bələdiyyə Teatrının aktyoru idi. O 1994-cü ildən Bakı Bələdiyyə Teatrında fəal çalışan Rafiq İbrahimov bir-birindən maraqlı obrazlar yaradıb.
Əməkdar artist Zemfira Nəcəfova avqustun 1-i 2024-cü ildə 74 yaşında vəfat edib. O, Lənkəran Dövlət Dram Teatrının aktrisası olub. Əməkdar artist Azərbaycanın klassik dramaturgiya nümunələrində Ziba xanım, Pəri xanım, Təyyibə xanım, Mehri xanım, Səlma ana kimi obrazları ilə yadda qalıb.
Aktrisa Elmira Hüseynova da bu ilin avqustun 28-də vəfat edib. O uzun müddət xərçəng xəstəliyindən əziyyət çəkib. Mərhumla vida mərasimi Təzə Pir məscidində keçirilib. 71 yaşlı Elmira Hüseynova A. Şaiq adına Azərbaycan Dövlət Kukla teatrının yüksək dərəcəli artisti olub.
