“Son illər ərzində Bakı çox dəyişib. Burada universitet bitirmişəm. 33 ildir Bakıya gəlmək imkanım olmamışdı”.
Bunu Bakuplus.az-a müsahibəsində COP29-un afrikalı iştirakçısı Musa Konate deyib.
Musa Konate saytımıza bildirib ki, o, Bakıya ilk dəfə 1988-ci ildə gəlib:
“Mən Burkina-Fasoluyam. Bakıya 1988-ci ildə gəlmişəm. 1988-1991-ci illərdə burada təhsil almışam. Azərbaycan Memarlıq və İnşaat Universitetini bitirmişəm. Şərifzadə küçəsindəki yataqxanada qalırdım. 1991-ci ildə Bakıdan getdim. 33 ildir Bakıya gəlmək imkanım olmamışdı, çox təşəkkür edirəm ki, COP29 sayəsində yenidən Vətənim Bakıya gəlmək şansım oldu. Bunun üçün Azərbaycana çox təşəkkür edirəm. Düşünürəm ki, son illər ərzində Bakı çox dəyişib. Tamam başqa şəhərdir sanki. Çox müasir şəhərdir. Bununla fəxr edirik. İndi insanlar da bilir ki, Azərbaycan çox böyük və güclü dövlətdir. COP29 sayəsində insanlarda bunu biləcəklər və bizim harada təhsil aldığımızı görəcəklər”.
O, ölkəmizin insanlarının qonaqpərvər olduğunu xüsusi vurğulayıb:
“Burada insanlar çox qonaqpərvərdirlər. Bu ölkə bizi cavan olanda necə qonaqpərvər qəbul etmişdisə, indi də eyni qonaqpərvərliyi COP29-da digər ölkələrin nümayəndələrinə göstərir. Bu çox vacibdir. Burada həm bizə, həm də bütün xarici qonaqlara çox gözəl davranırlar”.
Müsahibimiz Azərbaycan və rus dillərini necə öyrəndiyini də deyib:
“Rus dilini Bakıda öyrənmişəm. Əvvəl Kiyevdə, sonra 1-2 kursu Odessada oxumuşam, 3-5-ci kursları isə Bakıda keçirmişəm. Bu, mənə rus dilində danışmağa imkan verdi. Halbuki, çoxdandır rus dilində danışmıram, amma çalışıram ki, bunu edim. Demək olar ki, Azərbaycan dilini unutmuşam. Yadımda qalanlar “salam”, “necəsən”, “yaxşıyam”, “çox sağ ol” (gülür). Düşünürəm ki, Azərbaycan dilini yenidən öyrənəcəm”.
Milli yeməklərimizdən danışan afrikalı müsahibimiz mətbəximizin təamları ilə tanış olduğunu deyib:
“Əlbəttə, çox yemişəm. Burada çox dostlarım var. Mən onlarla birlikdə kabab yedim və digər Azərbaycan milli yeməklərini daddım. Dünən biz məzun olduğumuz universitetin rektoru və dostlarım ilə birlikdə yeməkdə idik. Xoş günləri xatırlayırdıq”.
