Son günlər “BakıKart” nağdsız elektron ödəniş alətinin adından dələduzluq kampaniyası həyata keçirilir.
Bakuplus.az xəbər verir ki, bu barədə məlumatlar sosial şəbəkələrdə reklama qoyularaq insanların xəbər lentinə çıxarılır.
Elanda qeyd edilən məlumata görə, “BakıKart”ı 4 manata əldə edənlərə 6 ay şəhərdaxili bütün ictimai nəqliyyatlardan limitsiz istifadə imkanı verilir. Bu kampaniyanın müddətinin isə dekabrın 7-ə qədər olduğunu yazırlar.
Məsələ ilə bağlı Bakuplus.az Azərbaycan Yerüstü Nəqliyyat Agentliyinə (AYNA) sorğu ünvanlayıb.
AYNA-nın mətbuat katibi Tural Orucov sorğuya cavab olaraq bildirib ki, 4 AZN ödəyərək ictimai nəqliyyatdan 6 ay ərzində istifadə imkanın yaradılması ilə bağlı bəzi sosial şəbəkə hesabları üzərindən yayılan məlumatlar həqiqəti əks etdirmir:
“Kiberdələduzlar qeyri-qanuni yolla maddi vəsait əldə etmək məqsədilə sosial şəbəkələrdə hesablar yaradaraq, bu hesablar üzərindən vətəndaşları müəyyən linklərdə qeydiyyatdan keçməyə təşviq edirlər. Vətəndaşlardan qazandıqları hədiyyənin çatdırılması üçün fərdi məlumatları və ödəniş üçün bank kartının məlumatlarını daxil etməsi istənilir.
Vətəndaş keçidə daxil olaraq kart hesabının məlumatlarını təqdim etdikdə hesabın balansında olan vəsait kiberdələduzların əlinə keçir.
Vətəndaşlara belə bildirişlərə inanmamağı və bank məlumatlarını təqdim etməməyi tövsiyə edirik”.
Fidan İlqar
