Bu ilin yanvar-noyabr aylarında Azərbaycanda pərakəndə ticarət şəbəkəsində istehlakçılara 3 milyard 120,4 milyon manatlıq avtomobil benzini və dizel yanacağı satılıb.
İnsanoid.com Dövlət Statistika Komitəsinə istinadən xəbər verir ki, bu göstərici ötən ilin müvafiq dövrü ilə müqayisədə 6,9 % çoxdur.
Hesabat dövründə istehlakçıların aldıqları mallara sərf etdikləri ümumi məbləğin 5,8 %-i avtomobil benzini və dizel yanacağına yönəldilib.
Eyni zamanda, 2024-cü ilin yanvar-noyabr aylarında Azərbaycanda pərakəndə ticarət şəbəkəsində istehlakçılara 53 milyard 867,7 milyon manatlıq məhsul satılıb. Bunun 29 milyard 534,8 milyon manatı ərzaq məhsulları, içkilər və tütün məmulatları, 24 milyard 332,9 milyon manatı isə qeyri-ərzaq mallarının satışına sərf olunub.
2023-cü ilin müvafiq dövrü ilə müqayisədə pərakəndə ticarət dövriyyəsi real ifadədə 3,8 %, ərzaq məhsulları, içkilər və tütün məmulatları üzrə 2 %, qeyri-ərzaq malları üzrə isə 6,1 % artıb.
