Milli Məclisin ötən gün keçirilən plenar iclasında bir sıra mühüm qanun layihələri III oxunuşda qəbul edilib.
Bunlardan biri “Vergi Məcəlləsində dəyişiklik edilməsi haqqında” qanun layihəsidir. Bu dəyişikliklər yerli istehsal avtobuslarının satışının ƏDV-dən azad edilməsi, mədəniyyət müəssisələrinə ödədiyi ƏDV-nin 50%-nin geri qaytarılması, bərpaolunan enerji layihələri ilə bağlı avadanlıqların idxalının vergidən azad edilməsi və dəmir yolu ilə daşınan tranzit yüklərin yol vergisindən azad edilməsi kimi məsələləri əhatə edir.
Mövzu ilə bağlı Bakuplus.az-a açıqlamasında Milli Məclisin İqtisadi siyasət, sənaye və sahibkarlıq komitəsinin üzvü Aydın Hüseynov bildirib ki, vergi Məcəlləsinə təklif edilən dəyişikliklərin əsas istiqamətləri sahibkarlıq və investisiya fəaliyyətinin təşviqi, sahibkarlıq subyektlərinin vergi yükünün azaldılması, vergi nəzarəti mexanizminin və vergi inzibatçılığının təkmilləşdirilməsi, beynəlxalq reytinqlərdə ölkəmizin mövqeyinin yaxşılaşdırılmasından ibarətdir:
“Eyni zamanda, qanunvericilikdə edilən dəyişikliklər bərpaolunan enerji mənbələrindən istifadə sahəsində həyata keçirilən layihələrə investisiya qoyuluşunu stimullaşdırmaq, uzunmüddətli dövrdə dövlətin maliyyə yükünü azaltmaq, istehlakçılar üçün tariflərin aşağı salınmasını və daxili istehsalın dəstəklənməsi məqsədilə vergi azadolmalarını nəzərdə tutur”.
Millət vəkili qeyd edib ki, dəyişikliklərə əsasən, teatr, kino, muzey və simfonik orkestr fəaliyyəti üzrə sahələrdən əldə edilən mənfəətin 90 faizi 5 il müddətinə vergidən azad olunacaq:
“Eləcə də yerli istehsal avtobusların satışının ƏDV-dən azad edilməsi, insanların mədəniyyət müəssisələrinə ödədiyi ƏDV-nin 50%-nin geri qaytarılması, bərpaolunan enerji layihələri ilə bağlı avadanlıqların idxalının vergidən azad edilməsi, dəmir yolu ilə daşınan tranzit yüklərin yol vergisindən azad edilməsi və digər məsələlər bura aiddir. Dövriyyələrin şəffaflaşdırılması və gəlirliliyin artırılması məqsədilə kiçik sahibkarlıq subyektlərinə də bir sıra güzəşt və azadolmaların tətbiqi nəzərdə tutulur. Bundan başqa, kənd təsərrüfatı məhsullarının istehsalının stimullaşdırılması və həmin məhsulların qiymətlərinin artımının qarşısını almaq məqsədilə onların satışı üzrə ƏDV-nin ticarət əlavəsindən hesablanması rejiminin tətbiqi müddəti uzadılacaq.
Sahibkarlıq fəaliyyətinin, ölkədə rəqabətədavamlı neft məhsullarının istehsalının inkişafı üçün lazımi şəraitin yaradılması və daxili bazarın qorunması məqsədilə iri neft emalı zavodlarının modernləşdirilməsi işlərinin davam etdirildiyi nəzərə alınaraq onlar tərəfindən avadanlıqların və materialların idxalı ƏDV-dən azad olunacaq. Həmçinin xarici dövlətlərin yük avtomobilləri, qoşqulu və yarımqoşqulu avtonəqliyyat vasitələrinin 2025-ci ilin yanvar ayının 1-dən etibarən 2 il müddətinə yol vergisindən azad edilməsi nəzərdə tutulur”.
A.Hüseynov bildirib ki, vergi nəzarətini artırmaq məqsədilə “Nağdsız hesablaşmalar haqqında” qanunda da dəyişiklik edilir:
“Belə ki, 2025-ci ildən etibarən ƏDV ödəyiciləri və dövriyyəsindən 8 % dərəcəsi ilə sadələşdirilmiş vergi ödəyən ictimai iaşə fəaliyyəti ilə məşğul olan vergi ödəyiciləri tərəfindən təqvim ayı ərzində ümumi məbləği əvvəlki təqvim ayında təqdim edilən mal, iş və xidmətlər üzrə dövriyyənin 2 %-dən artıq olan hesablaşmalar üzrə ödənişlər yalnız nağdsız qaydada həyata keçirilməlidir”.
Nəzrin Vahid
