Ötən gün Əməkdar artist Aygün Bəylərin məzarı üstündə abidəsi ucaldılıb. Bu, sosial şəbəkələrdə müzakirələrə səbəb olub.
Xatırladaq ki, məzarüstü abidə Suraxanı qəbiristanlığında qoyulub. Abidənin müəllifi Xalq rəssamı Natiq Əliyevdir
Məsələ ilə bağlı Bakuplus.az–ın əməkdaşı mərhum Əməkdar artist Aygün Bəylərin bacısı Zümrüd Hümmətova ilə danışıb.
O, bacısının abidəsinin ucaldılması məsələsinə aydınlıq gətirib:“Bacımın abidəsinin ucaldılmasında Natiq müəllimin əziyyəti çox olub. Xüsusi minnətdarlığımı bildirirəm. Abidənin ucaldılmasında hər kəsin əməyi var. Aygünsevərlərin dəstəyi oldu. Hər kəsə təşəkkür edirəm. Təbii ki, ailə üzvləri olaraq biz də kömək göstərdik”.
Z.Hümmətova mərhum Əməkdar artistin məzarının gec abadlaşdırılması ilə bağlı yayılan məlumatlara aydınlıq gətirib:
“Onu deyim ki, biz bakılılarda məzar daşı ildönümünə yaxın qoyulur. Çünki yağış suyundan çöküntü ola bilər. Büst çox ağırdır, çökməməsi üçün çalışırlar. Büst də məzarı ilə eyni istiqamətdədir. Allah bacıma qəni-qəni rəhmət etsin, ruhu şad olsun”.
Qeyd edək ki, Əməkdar artist Aygün Bəylər 6 yanvar 2024-cü ildə Ankarada vəfat edib. 8 yanvar tarixində isə Bakıda, Suraxanı kənd qəbiristanlığında torpağa tapşırılıb.
