Azərbaycanın milli aviadaşıyıcısı AZAL Bakı-Naxçıvan-Bakı marşrutu üzrə onlayn bilet alışı prosesini sərnişinlər üçün daha rahat və sürətli etmək məqsədilə yeni rəqəmsal həllər tətbiq edib.
İnsanoid.com xəbər verir ki, AZAL-ın rəsmi saytı və mobil tətbiqi vasitəsilə Naxçıvan reyslərinə onlayn aviabilet alışı artıq İnnovasiya və Rəqəmsal İnkişaf Agentliyinin (İRİA) təqdim etdiyi “digital.login” sistemi ilə də mümkün olub. Yeni xidmət sərnişinlərin təyyarə bileti alarkən şəxsi məlumatlarını əl ilə daxil etmə ehtiyacını aradan qaldırır. “Digital.login” və ya “SİMA İmza” ilə verifikasiya prosesindən keçən sərnişinlər sadəcə şəxsiyyət vəsiqəsinin seriya nömrəsini qeyd etməklə bilet ala bilərlər. Digər şəxsi məlumatlar sistem tərəfindən avtomatik doldurulur. Bu yenilik bilet alışı prosesini sürətləndirir, insan səhvlərini minimuma endirir və vaxta qənaət edir.
Bir qrup sərnişin üçün bilet rəsmiləşdirildikdə yalnız bir nəfərin şəxsiyyətinin “digital.login” vasitəsilə təsdiqlənməsi kifayətdir. Lakin məlumatların avtomatik doldurulması yalnız verifikasiya prosesindən keçmiş şəxs üçün mümkündür, digər sərnişinlər barədə məlumatlar ənənəvi qaydada daxil edilməlidir.
Qeyd edək ki, AZAL Bakı-Naxçıvan-Bakı marşrutu üzrə xidmət keyfiyyətini artırmaq və şəffaflığı təmin etmək üçün daha əvvəl də bir sıra rəqəmsal yeniliklər tətbiq edib. “SİMA İmza” inteqrasiyası ilə yanaşı, onlayn qeydiyyat xidməti də sərnişinlərin istifadəsinə verilib. Eyni zamanda, İRİA-nın “mygov” platforması vasitəsilə kassalarda rəqəmsal şəxsiyyət vəsiqəsindən istifadə etməklə aviabilet əldə etmək imkanı yaradılıb.
AZAL-ın tətbiq etdiyi bu rəqəmsal yeniliklər sərnişin məmnuniyyətini artırmağa və bilet alışı prosesini daha əlçatan etməyə yönəlib.
